Тыя, хто наважыўся выказаць незадаволенасць існуючай уладай шпацыравалі па праспекце Незалежнасці. Найбольшая канцэнтрацыя удзельнікаў (блізу сотні чалавек) была ў раёне перакрыжавання праспекта і вуліцы Леніна. Там жа сканцэнтраваліся супрацоўнкі міліцыі. Людзі спачатку стаялі моўчкі. Пасля натхняльных сігналаў аўтааматараў раз-пораз пачыналіся апладысменты. Часам прысутныя скандавалі «Пераменаў!». Міліцыянты дэманстратыўна здымалі ўдзельнікаў гулянняў на відэакамеру. За сітуацыяй назіраў супрацоўнік пракуратуры. Хоць напагатове ў дварах стаяў транспарт са спецназам і аўтазакі, абышлося без затрыманняў. Як вядома, ініцыятары кампаніі «Рэвалюцыя праз сацыяльныя сеткі» абвясцілі пра аднаўленне маўклівых акцый пратэсту па серадах. Першыя восеньскія гулянні прайшлі у беларускіх гарадах 21 верасня.