TL;DR: Шматлікія YouTube-каналы ў сучаснай Беларусі прызнаныя «экстрэмісцкімі». За падпіску на такія рэсурсы прадугладжаная адміністрацыйная адказнасьць. Brama пазначае небясьпечныя каналы і відэа. Будзьце ўважлівымі!
У сучаснай Беларусі «экстрэмісцкімі» прызнаюцца шматлікія каналы перадачы інфармацыі: ад інтэрнэт-сайтаў і YouTube-каналаў да друкаваных кніг, музычных кліпаў і нават адрасоў электроннай пошты. Гэтыя матэрыялы ўключаюцца ў «Рэспубліканскі сьпіс экстрэмісцкіх матэрыялаў», які вядзе Міністэрства інфармацыі на падставе «судовых» рашэньняў. Сьпіс пастаянна пашыраецца і налічвае некалькі тысячаў пазыцый, ахопліваючы амаль усе незалежныя мэдыя і інфармацыйныя праекты.
Такая сітуацыя прызнаецца міжнароднымі экспэртамі і праваабаронцамі як форма татальнай цэнзуры. Пад выглядам барацьбы з экстрэмізмам дзяржава душыць іншадумства, абмяжоўвае доступ да праўдзівых навін і перасьледуе за культурную дзейнасьць. Гэта ненармальна, бо парушае канстытуцыйныя правы на свабоду слова, інфармацыі і творчасьці, ствараючы атмасфэру страху.
За распаўсюджваньне або захоўваньне «экстрэмісцкіх матэрыялаў» (напрыклад, рэпост навіны, падпіску на канал або нават «лайк» відэа) прадугледжана адміністрацыйная адказнасьць паводле арт. 19.11 КаАП. Грамадзянам пагражаюць буйныя штрафы або адміністрацыйны арышт да 15 сутак з абавязковай канфіскацыяй тэлефона ці кампутара. За апошнія гады сотні звычайных грамадзян былі пакараныя за падпіскі на рэсурсы, якія ўлады палічылі небясьпечнымі.
На Brama старонкі ўсіх каналаў і відэа, якія прызнаныя ў цяперашняй Беларусі «экстрэмісцкімі», адмыслова пазначаныя. Сыстэма штотыдзень аўтаматычна абнаўляе інфармацыю аб «экстрэмісцкіх» YouTube-каналах на аснове інфармацыі ў «Рэспубліканскага сьпісу экстрэмісцкіх матэрыялаў». Але праз асаблівасьці фармаваньня гэтага сьпісу, некаторыя каналы могуць быць выпадкова прапушчаныя ці, наадварот, пазначаныя «экстрэмісцкімі». Калі вы ў Беларусі, заўжды правярайце, на якія каналы вы падпісываецеся і якія відэа «лайкаеце». Дбайце пра сваю бясьпеку!