Беларусы не давяраюць праваахоўным органам, не вераць судам, яны адчуваюць сябе безабароннымі. Тым не менш значная частка нашых грамадзян усё яшчэ выказваецца за смяротнае пакаранне. 30 лістапада Дзмітрыю Канавалаву і Уладзіславу Кавалёву вынесены смяротны прысуд. Пад петыцыяй супраць іх расстрэла на сённяшні момант ужо падпісалася больш за 61 тысячу чалавек. Але гэта, зразумела, найбольш актыўная і палітычна адукаваная частка насельніцтва. Мы жа вырашылі запытацца звычайных мінчукоў, якія штодня шпацыруюць па маршруце дом—праца—крама—дом, пра тое, як яны ставяцца да смяротнага пакарання. Было апытана больш за 100 чалавек. Зразумела гэта не рэпрэзентатыўная выбарка. Па выніках нашага апытання нельга судзіць пра стан грамадства. Аднак гэта і не было нашай мэтай. Нельга сказаць, што абсалютная большасць апытаных выказалася "за" смяротнае пакаранне. Аднак, тых, хто «супраць», усё ж такі пакуль меней (прыкладна 45 працэнтаў). Цікава, што пры адказе на пытанне «А чаму вы за смяротнае пакаранне?», большасць узгадвала савецкае мінулае. Маўляў, у СССР жа людзей расстрэльвалі, «ну а мы ж савецкія людзі»... Прапануем вашай увазе найбольш цікавыя і тыповыя адказы жыхароў сталіцы. Відэа: Лола Бурыева