Адыходзячы год быў вельмі насычаным на падзеі. Пачынаўся ён пад знакам Плошчы — 2010, а скончыўся шалёнымі цэнамі ў крамах. Цягам яго беларусы зразумелі, што такое жыць пад час эканамічнага крызісу, узгадалі «лихие 90-я», калі немагчыма было дастаць валюту, і пабачылі на свае вочы, што такое «тэракт»... Якая падзея запомнілася беларусам болей за іншыя? Якая падзея стала самай значнай для краіны? З такімі пытаннямі мы звярнуліся напрыканцы года да мінчукоў і да вядомых людзей Беларусі. Трэба адзначыць, што «лідарам» падзей стаў эканамічны крызіс і яго наступствы — велізарныя цэны і зааблочны курс валют. Яго узгадала амаль палова апытаных. Крыху больш за 20 працэнтаў апытаных палічылі галоўнымі для краіны і беларусаў палітычныя падзеі — вынікі Плошчы, суды і палітвязняў. Прыкладна столькі ж рэспандэнтаў увогуле не змаглі назваць нічога, што іх усхвалявала ў зыходзячым годзе. Дарэчы, шмат было і тых, хто папросту збягаў, калі чуў нашы пытанні. А некаторыя адкрыта казалі, што баяцца выказвацца «на камеру». Прапануем увазе чытачоў самыя цікавыя, а таксама тыповыя адказы. Лола Бурыева