Чарнобыльскі Шлях сёлета праходзіў пад лозунгам супраць атамнай небяспекі з боку Расіі. Гэта і будаўніцтва расійскага атамнага рэактара ў Астраўцы на расійскія ж крэдыты, і пагроза вяртання ў нашу краіну ядзернай зброі на крылах расійскіх знішчальнікаў, якія ўжо дыслакуюцца на вайсковых базах у Беларусі. Шэсце прайшло звыклым маршрутам ад кінатэатра Кастрычнік праз вуліцу Сурганава да плошчы Бангалор. Удзельнікі пераважна трымалі жоўтыя балонікі з намаляванымі знакамі радыяцыйнай небяспекі, самаробныя антыядзерныя плакаты, бел-чырвона-белыя сцягі. Дзе-нідзе ў руках людзей і на іх строях была бачная ўкраінская сімволіка. Нягледзячы на цудоўнае цёплае надвор'е, Шлях-2014 атрымаўся бадай адным з самых малалікіх за апошнія гады. Па некаторых ацэнках у шэсці прынялі ўдзел ад 300 да 500 чалавек. Актывісты выказвалі думку, што малая колькасць удзельнікаў абумоўленая слабай інфармацыйнай кампаніяй напярэдадні акцыі. Многія таксама не ўсведамляюць актуальнасці праблемы "мірнага атама"-- на пярэднім плане ў многіх пытанні выжывання і геапалітычныя катаклізмы на поўдні. Дый усё часцей пануе паняверка, што нешта магчыма змяніць нават у сваім уласным жыцці... Важны фактар, які паўплываў на бязлюднасць мерапрыемства -- вялікія выходныя наперадзе, а таксама тое, што гарадское кіраўніцтва адсунула пачатак акцыі на 4 гадзіны бліжэй да вечара. Людзі банальна параз'язджаліся. Але малалюднасць не знізіла градус пазітыўнага настрою, бо сонца і міліцыя (а можа нават у глыбіні душы і ўлады) былі з народам.