Чэмпіянат свету па хакеі ў Беларусі аказаўся даволі дарагім мерапрыемствам. Яго падрыхтоўка абышлася прыкладна ў мільярд даляраў. На гэтыя сродкі пабудаваныя 14 гатэляў, створана сучасная спартовая і транспартная інфраструктура. На дзяржаўным узроўні было прынятае рашэнне пра бязвізавы ўезд у краіну для заўзятараў хакею, што паспрыяла імкліваму росквіту ўязднога турызму. Мінск навадніла вялікая колькасць гасцей з Расіі, Польшчы, краін Балтыі, а таксама Чэхіі, Славакіі, Нямеччыны. Многія мінчукі адчулі атмасферу свята. Тым не менш, ёсць сур'ёзныя падставы меркаваць, што пасля чэмпіяната краіну чакае цяжкае пахмелле, бо эканамічныя, сацыяльныя і палітычныя праблемы толькі назапашваюцца і немінуча будуць ствараць напружанне ў грамадстве.