У групу увайшлі былыя вязні лагера, студэнты ўніверсітэта ім. Скарыны, валанцёры арганізацыі "Дзеці вайны", прадстаўнікі цыганскай супольнасці. Удзельнікі экскурсіі наведалі школьны музей у в.Азарычы, дзе сабраны дакументы, фотаздымкі, сведчанні былых вязняў лагера, а таксама мемарыял на месцы лагера. Азарыцкі лагер смерці быў арганізаваны нямецкім вайсковым камандваннем у сакавіку 1944 года падчас адступлення немцаў з Беларусі. У концлагер ля в.Азарычы, што ў Калінкавіцкім р-не, ў кароткі тэрмін немцы сагналі каля 50 тыс. мірных жыхароў (жанчын, дзяцей, старых) з Беларусі і Расіі. Лагер быў адметны тым, што ў ім не было аніякіх збудаванняў для вязняў, яны мусілі жыць на снезе, ім было забаронена раскладаць вогнішчы. Харчавання амаль не было. Сярод вязняў немцы наўмысна памясцілі вялікую колькасць хворых на сыпны тыф, такім чынам, у лагеры была высокая смяротнасць. Сярод гісторыкаў ёсць версія, што немцы спрабавалі выкарыстаць сыпны тыф як біялагічную зброю супраць наступаючага савецкага войска. Экскурсія ў Азарычы была арганізавана валанцёрамі грамадскай арганізацыі "Сацыяльныя праекты" пры падтрымцы нямецкага фонду "Памяць, адказнасць будучыня".