Супольны мітынг дэмакратычных партый і арганізацый адбыўся 4 кастрычніка ў Мінску на плошчы Свабоды. На прыступках будынку ратушы выступілі Уладзімір Някляеў, Мікола Статкевіч, Анатоль Лябедзька, Юрась Губарэвіч, Аляксей Янукевіч, Алесь Талстыка, Вячаслаў Сіўчык і іншыя. Над плошчай луналі бел-чырвона-белыя сцягі. Міліцыя правядзенню акцыі не перашкаджала, але склала пратаколы аб адміністратыўным парушэнні на некаторых выступоўцаў. Удзельнікі акцыі лічаць, што размяшчэнне на тэрыторыі Беларусі расійскай вайсковай базы супярэчыць артыкулу 18 Канстытуцыі і нясе наўпроставую пагрозу страты суверэнітэту і незалежнасці краіны. Нагадаем, за некалькі дзён да акцыі Уладзімір Някляеў, Мікалай Статкевіч, старшыня АГП Анатоль Лябедзька, старшыня Партыі БНФ Аляксей Янукевіч, намеснік старшыні Руху «За Свабоду» Юрась Губарэвіч, старшыня руху салідарнасці «Разам» Вячаслаў Сіўчык, актывіст грамадзянскай ініцыятывы «Беларускі рух» Вацлаў Арэшка падпісалі сумесную заяву «За Беларусь без чужых вайсковых баз» і заклікалі сваіх прыхільнікаў прыйсці 4 кастрычніка на акцыю пратэсту супраць іх размяшчэння у Беларусі. Далучыліся да заявы таксама сустаршыня хрысціянскіх дэмакратаў Павал Севярынец, актывісты «Маладога фронту» і прадстаўнікі беларускай жаночай партыі «Надзея».