У Мінску адбылося традыцыйнае шэсце, прысвечанае гэтым разам 30-й гадавіне аварыі на Чарнобыльскай АЭС, у выніку якой прыблізна пятая частка Беларусі была забруджана радыяцыяй. З другой паловы 90-х гадоў улады узялі курс на замоўчванне наступстваў катастрофы. Скарацілася фінансаванне даследаванняў уздзеяння радыяцыі на арганізм чалавека, ліквідатараў пазбавілі ільготаў. У Астраўцы поўнай хадой ідзе будаўніцтва атамная электрастанцыі за расійскі крэдыт. Сёлета ўдзельнікі Чарнобыльскага Шляху патрабавалі ад уладаў спынення будаўніцтва Астравецкай АЭС, абнародвання праўды пра наступствы чарнобыльскай катастрофы для здароўя беларусаў, рэальнай, у першую чаргу медычнай, дапамогі пацярпелым, вяртання ільготаў ліквідатарам аварыі, якія атрымалі найбольшыя дозы радыяцыі. Надвор’е сёлета 26-га красавіка было халодным і вільготным. Збор удзельнікаў акцыі на пляцоўцы каля кіно “Кастрычнік” міліцыя абмежавала паўгадзінай, дазвалялі ісці толькі па вузкіх ходніках і перагарадзіла падыходы да царквы Іконы Маці Божай турнікетамі. Людзі адмовіліся праходзіць прыніжальную працэдуру міліцэйскага дагляду і зладзілі невялічкі мітынг не даходзячы да царквы. У шэсці прынялі ўдзел па розных ацэнках ад 700 да 800 чалавек. Падчас шэсця людзі неслі разнастайныя тэматычныя плакаты, нацыянальныя сцягі і скандавалі лозунгі "Не АЭС на Беларусі", "Верым! Можам! Пераможам!", "Жыве Беларусь!" Напярэдадні арганізатары адмовіліся падпісваць дамову з міліцыяй на ахову грамадскага парадку, палічыўшы выстаўлены сілавікамі рахунак у 35 мільёнаў рублёў безпадстаўным і незаконным.