Праект "ГосьЦі": беларусы замежжа і беларуская мова.
Мы з сябрамі пабудавалі мабільную лазню "Чыстыя капыты" і пачынаем відэа праект “ГосьЦі” пра жыццё беларусаў замежжа. Да нас будуць прыязджаць беларусы замежжа з розных гарадоў Злучаных Штатаў і, спадзяваемся, у хуткай будучыні, таксама з іншых краін. Нашы госці будуць распавядаць пра сваё жыццё пасля таго, як яны з'ехалі з Беларусі, і пра іх мясцовую беларускую суполку. Улетку мы плануем вандраваць з лазняй і наведваць сяброў у іншых гарадах.
У нас будуць у гасцях музыкі, мастакі, спартыўцы, рэжысёры, бізнэсоўцы, і іншыя цікавыя і паспяховыя беларусы, якія зараз жывуць у замежжы, каб пазнаёміць Вас з таленавітымі, шчырымі, ды інтэлігентнымі беларусамі, якія застаюцца беларусамі і за тысячы кіламетраў ад роднага кута. Ад Вас, паважаныя гледачы, мы будзем чакаць ідэі для традыцыйных беларускіх рэцэптаў, якія Вам цікавы і каго б вы жадалі пабачыць у якасці наступнага госця.
Чакаем і Вас да нас у ГосьЦі!