Гэты кліп мы прысвячаем усім, хто рупліва займаўся захаваннем і развіццём Беларушчыны, але ўжо не пабачыць яе росквіту. У тым ліку падляшскаму журналісту і дзеячу Лукашу Сцепанюку, якога не стала днямі Гурт Relikt выпусціў музычнае відэа да кампазіцыі “Не задавай сэрцу тугі” з альбома “Дрэва жыцця”. “Сюжэт роліка настолькі просты, што можа падацца, быццам яго няма наогул”, - зазначае лідар гурта бубнач Аляксандр Дземідзенка. “Мы гуляем па горадзе, займаемся творчасцю з сябрамі ў студыі і прыгадваем усё тое найлепшае, з чаго складалася жыццё беларусаў: сустрэчы, размовы, шпацыры… Усё тое, што кожны мог рабіць раней не задумваючыся, але чаго цяпер шмат хто пазбаўлены. І ўсё ж не трэба губляць надзеі, бо разам можна перадолець любыя абставіны, і пра гэта ўласна і вядзецца ў песні," - звяртае ўвагу музыка. Кліп здымаўся падчас запісу дыска “Дрэва жыцця” у 2019 годзе на вуліцах Мінска і ў студыі Everest Паўла Сінілы, дзе да нядаўняга часу стваралася бадай што ўся сучасная беларуская музыка. У здымках “Не задавай сэрцу тугі” паўдзельнічаў Юрка Асеннік - культавая фігура беларуска-польскага андэграўнду, падляшскі беларус, які не толькі стварыў вокладку дыска, але і адмыслова наведаў Мінск, каб запісаць вакальную партыю для трэка. Рэжысёрам музычнага відэа зноў выступіў Кірыла Чычэліс, які раней зняў для Relikt кліпы “Туман у мора” і “Прыйдзе іх дзень”. Зараз гурт базуецца ў Польшчы і рыхтуе прэзентаваць свой новы рэліз, запісаны на Радзіме.