Князь Мацей Радзівіл падчас сустрэчы з журналістамі 6 ліпеня 2016 года агучыў прапанову перазахаваць парэшткі мэцэнаткі Магдалены Радзівіл у Мінску каля Чырвонага касцёла. Магдалена Радзівіл фінансавала беларускія школы, выхад газеты “Наша Ніва”, першыя кнігі Максіма Багдановіча, Якуба Коласа, Канстанцыі Буйло ды іншыя выданні суполкі “Загляне сонца і ў наша ваконца. Плаціла стыпендыю студэнтам-беларусам, якія навучаліся ў Пецярбургу, апякалася тамтэйшай беларускай бібліятэкай. У 1918 годзе горача падтрымала стварэнне Беларускай Народнай Рэспублікі. Пасля заняцця Менска бальшавісцкімі войскамі выехала ў Варшаву. Памерла Магдалена Радзівіл 6 студзеня 1945 года ў Фрыбургу (Швайцарыя), у кляштары сясцёр дамініканак.