Старшыня Рады БНР Івонка Сурвілла зьвярнулася да гасьцёў фэстывалю беларускае культуры Minsk x Minga, які адкрыўся 9 верасьня ў Мюнхене, Нямеччына. "Паважаныя госьці фэстывалю "Мінск і Мінга", Я радая вітаць вас ад імя Рады Беларускай Народнай Рэспублікі. Кожная імпрэза, дзе гавораць пра Беларусь і дзе прэзэнтуецца нашая культура, ёсьць надзвычай каштоўнаю. Беларусь - апошняя дыктатура на эўрапейскім кантынэнце. Тысячы беларусаў знаходзяцца ў турме за тое, што асьмеліліся выступіць супраць тыраніі. Дзясяткі тысячаў былі вымушаныя пакінуць сваю бацькаўшчыну. Нельга, каб сьвет забываўся пра Беларусь. Мюнхен - вельмі важнае месца для свабоднай Беларусі. На працягу некалькіх дзесяцігодзьдзяў адсюль працавала беларуская служба Радыё Свабода, якая была створаная намаганьнямі Рады БНР і даносіла інфармацыю з вольнага сьвету беларусам, якія цярпелі ад савецкага прыгнёту. Некалькі выбітных беларускіх дзеячоў і журналістаў пражывалі ў Мюнхене і пахаваныя тут. Я вельмі радая, што беларускае жыцьцё працягваецца ў вашым цудоўным горадзе, і шчыра дзякую згуртаваньню "Разам" за арганізацыю фэстывалю. Ich möchte auch alle deutschen Gäste des Festivals Minsk und Minga herzlich begrüßen. Belarus bleibt eines der unbekanntesten europäischen Länder in Deutschland. Ich hoffe, dass das Kennenlernen unserer Kultur Ihnen Belarus näher bringen wird. Дык жадаю вам атрымаць асалоду ад сёньняшняга канцэрту і высока ацаніць творчасьць беларускіх артыстаў, мастакоў і музы́каў на фэстывалі. Жыве Беларусь!"