Дарагія мае суродзічы ў Нямеччыне. Шчыра вітаю вас ад імя Рады Беларускай Народнай Рэспублікі і віншую з правядзеньнем гэтага важнага зьезду. Многія з нас ужо шмат гадоў жывуць далёка ад Радзімы, але не забыліся на яе. Гэта цудоўна, што Беларусь і адчуваньне сябе беларусамі й беларускамі здольныя аб'яднаць нас, сабраць нас разам. Гонар за сваю беларускасьць і салідарнасьць карысныя нам і нашым дзецям для таго, каб пачуваць сябе дастойна ў новай краіне. І таму задача беларускае дыяспары – ствараць доўгатрывалыя інстытуцыі, якія б існавалі даўжэй, чым жыцьцё аднаго чалавека. Якія былі б ачагамі беларушчыны для многіх пакаленьняў беларусаў і нашчадкаў беларусаў. Для гэтага запрашаю вас зьвярнуць увагу на досьвед беларусаў у Брытаніі, Амэрыкі і Канады. Беларусь патрабуе нашай дапамогі. Дапамагчы ёй павінны перадусім мы з вамі, хто жыве на свабодзе ад дыктатарскага рэжыму, але зьяўляецца часткай грамадзтваў краінаў вольнага сьвету. І вашая роля як беларускай грамады ў Нямеччыне асабліва важная, памятаючы пра ролю Нямеччыны як найбольш магутнай дзяржавы ў Эўропе, чый уплыў на падзеі ў Беларусі надзвычай вялікі. У гэтыя дні беларуская дыяспара традыцыйна ўшаноўвае памяць герояў Слуцкага збройнага чыну. У канцы лістападу 1920 году некалькі тысячаў адважных беларусаў падняліся на збройную барацьбу за сваю годнасьць і незалежнасьць супраць шматкроць мацнейшага ворага. Прайшло больш за сто гадоў, і іхная барацьба застаецца актуальнаю. Мы натхняемся іхнаю адвагай і верым, што перамога будзе за намі і за праўдай. Я зычу вам пасьпяховага зьезду, і каб подзьвіг Случчакоў абавязкова быў у вашых думках у гэтыя дні. Жыве Беларусь!