Дарагія байцы Палку імя Кастуся Каліноўскага. Я радая вітаць вас і віншаваць з атрыманьнем баявой узнагароды Беларускай Народнай Рэспублікі. Рада БНР, якую я маю гонар прадстаўляць, гэта найстарэйшы дзеючы беларускі дзяржаўны інстытут. 105 гадоў таму прадстаўнікі Беларусі, абраныя сярод дзьвюх тысячаў дэлегатаў Першага Ўсебеларускага зьезьду, абвесьцілі нашую Бацькаўшчыну незалежнай і дэмакратычнай – народнай – рэспублікай. Але ўжо празь лічаныя месяцы Беларуская рэспубліка была акупаваная расейскімі бальшавікамі. Беларусь тады першаю сярод новых дзяржаваў сталася ахвярай расейскага бальшавіцкага імпэрыялізму. Ужо пасьля нас расейцы захапілі Ўкраіну, краіны Балтыі, Польшчу. Пасьля падзеньня савецкага рэжыму Беларусь зноў стала першай ахвярай адроджанага расейскага імпэрыялізму ўжо ў дзевяностыя гады. Дыктатарскі рэжым Лукашэнкі быў усталяваны амаль трыццаць гадоў таму і трымаецца дагэтуль выключна дзякуючы падтрымцы Расеі, што асабліва паказаў 2020 год. Гэты рэжым працягвае расейскую каляніяльную палітыку, імкнецца зьнішчыць нашую мову, нашую культуру і памяць пра нашую гісторыю. Рэжым Лукашэнкі і расейскі напад на Ўкраіну – гэта праявы аднаго і таго ж самага: імкненьня расейцаў панаваць над іншымі народамі, прыніжаць іншыя народы. Расея застаецца нашым галоўным ворагам і галоўнай пагрозай для Беларусі. Дэкрэт аб вашым узнагароджаньні я падпісала ў дзень 160-годзьдзя паўстаньня Кастуся Каліноўскага на землях Беларусі. Нашае змаганьне супраць расейскай агрэсіі і за права свабодна жыць на сваёй зямлі працягваецца стагодзьдзямі. Вельмі павольна мы адваёўваем сваю свабоду. У 1918 годзе мы ўсталявалі сваё права быць прызнаным народам з сваім краем, у 1991 годзе мы аднавілі дзяржаўны сувэрэнітэт. Нашая задача - завершыць тое, за што змагаліся Кастусь Каліноўскі і ягоныя паплечнікі: вызваліць Беларусь ад дыктатуры і замежнай акупацыі. Зрабіць Беларусь свабоднай краінай, дзе кожнаму беларусу і кожнай беларусцы будзе вольна жыць. Мы ўсе хочам вярнуцца дадому, на радзіму. Да месцаў нашага дзяцінства і да магілаў нашых продкаў. Каб будаваць беларускую будучыню для нашых нашчадкаў. І вы - наш сёньняшні авангард, наш перадавы атрад. Уся Беларусь моліцца за беларускіх добраахвотнікаў, якія ваююць ва Ўкраіне супраць нашага агульнага гістарычнага ворага, і спадзяецца на вас. І самае галоўнае для кожнага беларуса ў сьвеце цяпер – дапамагаць вам, хто як можа. Каб вы прынесьлі перамогу Беларусі і беларускаму народу. Барані вас Божа. Жыве Беларусь!