Перад сваім вялікім восеньскім канцэртам у Prime Hall Лявон Вольскі ў прамым эфіры «Арт Сядзібы» зачытаў лісты ад сваіх прыхільнікаў. Фанаты Лявона Артуравіча віншавалі яго з днём нараджэння, дзякавалі за творчасць, дарылі падарункі, цікавіліся яго досведам працы ў агучцы, запытвалі пра вандроўкі і любімыя кнігі. Вядоўцам эфіра стаў Аляксей Сапрыкін. За самы цікавы ліст прыхільнікі артыста атрымалі бясплатныя запрашальнікі на канцэрт 21 верасня – імі стала сям’я, у якой усе (маці, тата і два сыны) напісалі свае пытанні і пажаданні спадару Лявону (па квіткі звярніцеся па тэлефоне +37525 9969376). Ліст атрымаўся вельмі кранальным, і менавіта яго Вольскі адзначыў як пераможцу. Таксама ў капэрце з лістом гэтая мілая сям’я перадала Лявону маленькі падарунак – медальён у стылістыцы 1794 года з выявай Тадэвуша Касцюшкі.