Антыкавідныя меры ў Польшчы выглядаюць больш сур'ёзнымі, чым у Беларусі, але праблем праз каранавірус у нашых суседзяў дастаткова. Прыкладна кожны месяц польскі ўрад прымае распараджэнні па ўвядзенні мер бяспекі на найбліжэйшы месяц праз пандэмію каранавіруса. З 22 снежня ў краіне цалкам зачыненыя музеі, тэатры, кінатэатры. Ва ўстановах грамадскага харчавання ежу можна ўзяць толькі на вынас. Маска абавязковая нават на вуліцы, а штраф за яе адсутнасць — 500 злотых (каля 350 беларускіх рублёў). У лютым чакаецца аслабленне абмежаванняў, пакуль жа польская сістэма аховы здароўя загружаная. Нават Нацыянальны стадыён (Stadion Narodowy), дзе праходзілі матчы чэмпіянату Еўропы па футболе ў 2012 годзе, некалькі месяцаў таму пераабсталяваўся пад бальніцу. Ці задаволеныя палякі мерамі, якія прымаюцца ў іх краіне для барацьбы з каранавірусам, ці вераць статыстыцы і як пабудаваны працэс навучання ва ўніверсітэтах, расказвае магістрантка факультэта арыенталістыкі Варшаўскага ўніверсітэта, былая выкладчыца трэцяй замежнай мовы МДЛУ Ксенія Цывуля.