Па дадзеных праваабарончага цэнтра "Вясна", толькі ў лістападзе ў Беларусі было арыштавана 1615 чалавек. У суме яны правялі (і яшчэ сядзяць) за кратамі 20550 сутак. Тыя, хто выходзіць з ізалятараў, кажуць, што там зроблена ўсё, каб як мага больш людзей заразіліся COVID-19. Еўрарадыё пагутарыла пра гэта з журналістам радыё "Свабода" Ігарам Карнеем, які быў затрыманы 15 лістапада і правёў 10 сутак у следчым ізалятары ў Жодзіна. У праграме "Вірусны эфект" ён пацвердзіў, што месцы ўтрымання зняволеных пад вартай — сапраўдны рассаднік COVID-19. У невялікіх камерах — па 20 чалавек. На ўсіх — 4 кубкі. А калі чалавеку зусім дрэнна, і ён звярнуўся па дапамогу, супрацоўнікі ізалятара могуць адказаць: "Гэта вам не Польшча!".