- У што верыш? - Веру ў Беларусь! Павел Латушка пра сваё бачанне нацыянальнай ідэі беларусаў 26 гадоў дзяржаўная ідэалагічная машына насаджвала думку, што беларуская нацыя яшчэ не сфармавалася, стварала вобраз памяркоўнага, беднага ва ўсіх адносінах народа, які сіратліва месціцца на “клочке земли”. З беларускай гісторыі выкрэсліваліся цэлыя стагоддзі, сімвалы і імёны. Замест таго каб падтрымліваць, дзяржаўная машына старанна знішчала значнасць асобы, адмаўляючы нам у яскравых прыкладах і героях, ідэолагі і прапаганда ўпарта змяшчалі акцэнт на спажывецкія каштоўнасці, спажывецкае разуменне сэнсу свайго існавання. Народ Беларусі прымушалі трываць, не цікавіцца нічым навокал і думаць “можа так і трэба”. Аднак нацыянальную ідэю нельга насадзіць сілай ці стварыць штучна, яна нараджаецца самім народам, назапашваецца стагоддзямі, паліруецца часам і праяўляеца натуральна. Менавіта таму, негледзячы на ўсе дзеянні ўлады, беларускі нацыянальны код спрацаваў, ён вытрымаў дзесяцігоддзі прыгнёту, і сёння мы бачым новы этап адраджэння беларускай нацыі, новае залатое стагоддзе, якое ўвойдзе у гісторыю. Цяпер адраджаецца разуменне: хто мы такія, адкуль мы прыйшлі, чаму жывем на гэтай тэрыторыі і што нас аб'ядноўвае. Адказы на гэтыя пытанні ўжо даўно вядомыя. Трэба ўсяго зазірнуць у наша мінулае і ў вочы адзін аднаго. Мы бачым сёння ў беларусах неверагодную прагу быць вольнымі, быць свабоднымі на сваёй зямлі і самім вырашаць свой лёс. Гэта неверагоднае імкненне да волі і ёсць наша нацыянальная ідэя. Адначасова адбываецца трагічнае сутыкненне архаічныга савецкага чалавека і сучаснай нацыі з яе імкненнем да пераменаў і свабоды. Дзесяцігоддзі савецкай улады мы не можам проста адрынуць і перагарнуць старонку, савецкія часы пакінулі свой след на пакаленнях беларусаў. Зараз мы павінны зразумець гэты ўплыў і развітацца, каб рухацца наперад. Шчаслівая будучыня нацыі ствараецца на ўстойлівых падмурках мінулага. Лукашэнка спрабаваў збудаваць краіну на адной назе - на аснове БССР і Вялікай Айчыйнай Вайны. Разумеючы важнасць гэтых падзей, мы ўсе ўсведамляем, што існаванне Беларусі пачынаецца не з 1919 года, у нас тысячагадовая гісторыя і велізарны культурны пласт. Сёння грамадства зноўку пачынае ўсведамляць сябе і сваю культуру, імкнецца да сваіх гістарычных і нацыянальных сімвалаў, і ніхто не зменіць гэтага. Так, мы, беларусы, часам вельмі талерантныя і можам патрываць, каб, як нам здаецца, не было большай бяды, але калі мы ўжо запрагаемся, нас не стрымаць і не спыніць у нашым імкненні. У што верыш? Веру ў Беларусь! - і гэта мая нацыянальная ідэя.