💌 Аддзячыць кухару і падтрымаць новыя рэцэпты https://ko-fi.com/budzma Дзелімся старымі рэцэптамі закусак, што можна падаваць перад гарачым на святы. ✅ КРУЧАНАЕ САЛА – смачна, прыгожа і лёгка жаваць Сала з хлебам – хіба самы старажытны бутэрброд, што елі нашыя продкі. Пару тлустых кавалкаў сала, луста хлеба, цыбуля і агурок упрыкуску былі частым абедам ці вячэрай для тагачасных беларусаў. Ашчаджаючы час для цяжкай фізічнай штодзённай працы людзі стараліся есці сытна і хутка. На святы ж склалася традыцыя апранаць самае прыгожае і лепшае, тое самае і са святочным сталом. А яшчэ да святаў загадзя рыхтаваліся. Традыцыя захавалася і па сённяшні дзень. ☝️ Нашыя продкі актыўна займаліся свінагадоўляй, таму чаго-чаго, а сала заўсёды хапала. Да таго ж свініну нарыхтоўвалі ўвосень, каб да зімовых святаў мяса і сала апрацаваць і падаць смакоцце на стол. 🍽 На святы маглі не проста парэзаць шматок кавалкамі, а зрабіць дробна насечанае сала з дадаткамі. Апошняе стагоддзе такое сала рабілі на мясарубцы. Не забудзьцеся выдаліць скурку! Цвёрдыя кавалкі скуркі ў страве сапсуюць уражанне аб далікатнай закусцы. 🧄 У кручанае сала можна дадаваць што заўгодна: часнок, папрыку, чорны перац, каляндру, кроп. Адзінае правіла – усё трэба здрабіць. Калі святочная вячэра вось-вось пачнецца, то добра перамяшайце сала з дадаткамі і пакіньце яго пры пакаёвай тэмпературы на 3-4 гадзіны, прынады хутчэй запрацуюць, а закуску будзе лёгка намазваць на хлеб. Калі час дазваляе, загадзя патрымайце кручанае сала ў халодным месцы суткі, потым крыху ў цяпле і рыхтуйце закускі. 🧅 Да кручанага сала з хлебам пасуюць хрэн, цыбуля зялёная ці чырвоная, а таксама салёны ці марынаваны агурок. Прыгажосць, водар прынадаў дадае пікантнасці і такі прадукт нашмат прасцей жаваць. ✅ СЕЛЯДЗЕЦ З ЯБЛЫКАМ - так, гэта смачна! З селядцом нашыя продкі пазнаёміліся яшчэ ў часы язычніцтва, ёсць верагоднасць, што адбылося гэта ў часы Рагвалода. Варагі вельмі любілі есці селядзец. Не адну тысячу жыццяў скандынаўскіх ваяроў выратавала гэтая засоленая рыба ў доўгіх вандроўках па марах. ☝️ Селядца было вельмі шмат, а засолены ён добра захоўваўся, таму ім было вельмі выгадна гандляваць, а пачаставацца ім мог амаль любы жадаючы, бо быў танным. Гэтая рыба магла ледзь не штодня з’яўляцца на сталах нашых продкаў. Елі яго як магнаты, так і беднякі. Не дарэмна па сённяшні дзень захаваўся даволі складаны рэцэпт “селядца па-радзівілаўску”. 🍽 Інгрыдыент даступны і недарагі. Вось нашыя продкі і дадумаліся падаваць селядца з яблыкам! Філе засоленай рыбы і ачышчаны кіслы яблык наразалі дробным кубікам, чырвоную цыбулю – тонка чвэрцькольцамі – усё ў адзін посуд, крыху перцу, пару лыжак смятаны, гарчыцы і гатова, толькі памяшаць. Каб інгрыдыенты “пажаніліся”, лепей пакінуць вымяшаную намазку на холадзе каля 4 гадзін. Упрыгожыць дастаткова кропам. Падаваць такую закуску можна і з гарачай варанай бульбай. ☝️ Абедзьве намазкі, у выглядзе закусак падаваць лепш на падсмажаным кавалку чорнага хлеба. Яго можна прысмажыць да хрумсткай скарыначкі на патэльні з кавалкам масла. Памятайце, палова смаку стравы заключаецца ў яе знешнім выглядзе! Не шкадуйце свайго часу, каб упрыгожыць стравы. 📌 Гатуем САЛА: белае салёнае сала Любыя дадаткі ў любой колькасці выключна па смаку 📌 Гатуем СЕЛЯДЗЕЦ: селядзец слабасалёны 250 г 1 яблык 0,5 цыбуліны 1 ч. лыжка гарчыцы зарнем 2 ст. лыжкі смятаны чорны перац па смаку Музыка: Стары Ольса @StaryOlsa #будзьмабеларусамі #беларускаякухня #гатуемзбудзьма 👉БОЛЬШ РЭЦЭПТАЎ: https://youtube.com/playlist?list=PLp0aOIn3iSMG-YPz0uMjB0KInN7ffCIbp БУДЗЬМА РАЗАМ: Сайт https://budzma.org Telegram https://t.me/budzmaby Facebook https://www.facebook.com/budzmabelarusami Instagram https://www.instagram.com/budzma/ Twitter https://twitter.com/budzma VK http://vk.com/budzmabelarusami Данаты https://ko-fi.com/budzma