Учора Святлана Ціханоўская завяршыла рабочую паездку ў Кіеў па запрашэнні Уладзіміра Зяленскага. Падчас сустрэчы абмяркоўваліся перспектывы беларуска-ўкраінскага супрацоўніцтва і падтрымка дэмакратычнай Беларусі. У Вярхоўнай Радзе Украіны адбылася двухгадзінная рабочая сустрэча, арганізаваная аб’яднаннем «За дэмакратычную Беларусь». У ёй удзельнічалі беларускія добраахвотнікі і прадстаўнікі розных арганізацый, а таксама украінскія дэпутаты і спецыяльны прадстаўнік Украіны па Беларусі. Удзельнікі сустрэчы абмеркавалі праблемы, з якімі сутыкаюцца беларусы ва Украіне, і прапанавалі канкрэтныя шляхі іх вырашэння. Асобна было адзначана стварэнне новых інстытуцый, такіх як афіцыйны прадстаўнік Украіны па Беларусі і місія дэмакратычных сілаў Беларусі ва Украіне, што сведчыць аб практычнай падтрымцы.