25 кастрычніка ў Бельску Падляшскім у Польшчы падчас фестывалю «Бардаўская восень» прайшла цырымонія ўзнагароджання прэміяй Анемпадыстава за найлепшую вокладку кнігі, выдадзенай у 2024 годзе. Пераможцамі сталі Ігар Юхневіч і Маша Мароз за вокладку кнігі «Мое баба – діректор морга» Голі з Ополя (самвыд, 2024). Сябра журы прэміі Анатоль Лазар расказаў у відэа-інтэрв’ю пра асаблівасці сёлетнега прэміяльнага сезона. Кароткі спіс фіналістаў сёлетней прэміі даступны тут: https://penbelarus.org/2025/10/15/tam-dze-hrybtok-knigi-robiczcza-geroem-a-shryft-intrygayu-karotki-spis-premii-imya-mihala-anempadystava.html Прэмія імя Міхала Анемпадыстава ўшаноўвае спадчыну выбітнага беларускага мастака, дызайнера і культуролага, які значна паўплываў на развіццё візуальнай культуры Беларусі. Заснаваная ў 2019 годзе, яна адзначае найлепшыя дызайнерскія рашэнні ў афармленні кніжных вокладак. Арганізатары прэміі — Беларускі ПЭН і фонд «Open Culture» пры падтрымцы партнёраў: ТАА «H&L», кампаніі «Laut» і фестывалю «Бардаўская восень». Праект фінансуецца ў рамках Нацыянальнага плану аднаўлення Міністэрства фондаў і рэгіянальнай палітыкі Рэспублікі Польшча.