27 красавіка ў Вільні адбыліся мерапрыемствы, прысвечаныя памяці аб Чарнобыльскай катастрофе і праблемам ядзернай бяспекі. На мітынгу на плошчы Кудзіркі ўдзельнічалі прадстаўнікі міжнародных арганізацый, грамадскіх ініцыятыў і актывісты, у тым ліку Сяргей Юхно, які стаў ахвярай аварыі на ЧАЭС. Сярод выступоўцаў былі Торд Б’ёрк з International Peace Bureau, Роаланд Рытман з Friends of the Earth, Ханс Хендрык з World BEYOND War, Вольга Карач з ініцыятывы «Наш Дом» і Аляксандр Дабравольскі, старэйшы дарадца Святланы Ціханоўскай. У рамках мерапрыемства таксама прайшоў антыядзерны роварны прабег, у якім прынялі ўдзел раварысты з антыядзернай сімволікай. Завяршылася падзея выступам Вольгі Фалей з гурта «Прафілактыка патрыятызму», якая выканала некалькі знаёмых хітоў і прадставіла прэм'еру новай песні.