Нашчадкі паўстанцаў Кастуся Каліноўскага жылі і жывуць у розных гарадах ды мястэчках Беларусі. І сярод іх нямала знакамітых людзей! У вёсцы Русаковічы Пухавіцкага раёна такой знакамітай асобай быў мастак Генрых Вейсенгоф. Дзяцінства Генрыха прайшло ў Сібіры, куды быў высланы яго бацька Уладзіслаў, удзельнік паўстання 1863 г. Генрых Вейсенгоф атрымаў выдатную мастацкую адукацыю і для сталага жыхарства абраў вёску Русаковічы. Гэтая вёска з пачатку ХІХ ст. належала шляхцічам Быкоўскім – продкам мастака па матчынай лініі. Мясцовыя краявіды патрапілі на многія карціны Генрыха Вейсенгофа, які любіў Радзіму і дбаў пра яе будучыню.