Вёска Лемяшэвічы, што ў Пінскім раёне, – адзін з маляўнічых куткоў беларускага Палесся, заселены людзьмі яшчэ ў глыбокай старажытнасці. У Лемяшэвічах ёсць драўляная царква Нараджэння Прасвятой Багародзіцы, пабудаваная ў 1885 годзе. У гэтай царкве знаходзілася арыгінальная райская брама, сплеценая з саломкі. Сёння саламяная райская брама з вёскі Лемяшэвічы – адзін са славутых экспанатаў Музея беларускага народнага мастацтва. У 1883 годзе ў Лемяшэвічах нарадзіўся Парфірый Рубановіч – будучы святар, далучаны да ліку святых новапакутнікаў зямлі беларускай.