У нядзелю, 31.01.2021 г, беларусы Кіева традыцыйна правялі на Майдане Незалежнасьці сваю акцыю салідарнасьці. Гэтым разам яна мела назву «Героі не паміраюць» і была прысьвечана ўсім Героям, якія былі забітыя рэжымам Лукашэнкі. На ёй зьбіралі подпісы пад зваротам у АБСЭ і ААН з заклікам стварыць міжнародны орган для расьсьледаваньня злачынстваў рэжыму Аляксандра Лукашэнкі і далейшага яго прыцягненьня да адказнасьці. «Мы ўжо сабралі больш як 100 подпісаў, адначасова такія ж акцыі адбываюцца ў Львове, Адэсе і Чарнігаве. Потым мы адначасова накіруем гэтыя звароты з патрабаваньнем стварыць міжнародны трыбунал у міжнародныя арганізацыі», – сказаў гомельскі актывіст Валер Сьляпухін. Ён знаходзіцца ва Ўкраіне ўжо больш як два месяцы – вымушаны быў уцячы пасьля двух адміністрацыйных арыштаў і штрафаў. Пасьля гэтага удзельнікі акцыі далучыліся да традыцыйнага штогадовага Маршу памяці Міхася Жызьнеўскага, беларуса, які загінуў ад кулі сілавікоў падчас падзеяў Еўрамайдану на вуліцы Грушэўскага раніцаю 22 студзеня 2014 у Кіеве. СМІ пра акцыю: https://svabod1.azureedge.net/a/31078573.html Відэа: https://youtube.com/watch?v=0jqul2FBSso&feature=share https://youtube.com/watch?v=cUP_tj_pinc&feature=share