Ганцаўшчына – край таленавітых і творчых людзей, дзе пражывае болей за 25 тысяч чалавек. Ганцавіцкі раён адзіны ў краіне, дзе больш за 90% насельніцтва вызначаюць беларускую мову роднай. У 2011 годзе ў горадзе адзначылі «Дзень беларускага пісьменства». Перад святам горад Ганцавічы прыкметна абнавілі: на цэнтральных вуліцах адрамантавалі фасады будынкаў і размясцілі білборды з выявамі Якуба Коласа і Аляксандра Сержпутоўскага, упарадкавалі парк, дзе з’явілася ратонда з сімвалічнымі журавамі і раскошная альтанка. Асаблівым гонарам можна лічыць алею пісьменства, якую пачынае знак Дня пісьменства. Далей на памятных аркушах увекавечаны імёны мясцовых пісьменнікаў: Івана Лагвіновіча, Віктара Гардзея, Алеся Каско, Уладзіміра Марука, Аляксандра Сержпутоўскага, Васіля Праскурава, Івана Кірэйчыка, Міхася Рудкоўскага. Завяршае алею помнік народнаму песняру Якубу Коласу, чый лёс звязаны з ганцавіцкай зямлёй. Сваю педагагічную дзейнасць Канстанцін Міцкевіч пачынаў у вёсцы Люсіна Ганцавіцкага раёна.