Дырэктар Symbal.by Павел Белавус: Што рабіць? Адказ адзін — не маўчаць. Раскрываць хлусню, фальсіфікацыі і паказуху ў вашых гарадах і мястэчках. Добры дзень! Мяне завуць Павел Белавус, я дырэктар кампаніі Symbal.by. За 2019 год наша кампанія заплаціла 150 тысяч рублёў падаткаў. Апошнія 10 гадоў я працаваў як наёмны супрацоўнік, прадпрымальнік, сузаснавальнік і кіраўнік кампаніі. Агульная сума падаткаў, якую я заплаціў, набліжаецца да 1 мільёна рублёў. Ці адчуў я ўдзячнасць дзяржавы за сваю працу? Не! Штрафы, некалькі праверак, запалохванні, забароны мерапрыемстваў і 15 сутак арышту. Такой была ўдзячнасць за мае грошы ў дзяржаўны бюджэт. Нехта скажа: "Ты вар’ят! Едзь за мяжу і рэалізоўвайся там". А я не магу. Я хачу жыць і працаваць тут, у нашай краіне. Я хачу, каб Беларусь стала сапраўдным цэнтрам Еўропы, а беларусы — шчаслівымі людзьмі. У дзяржавы не хапае рэзерваў. Цікава назіраць, як зараз міністэрства фінансаў шукае і просіць грошы на падтрыманне сістэмы паўсюль, дзе толькі можа. Дзяржава хоча ўзяць 3 мільярда даляраў у крэдыт. І куды яны накіруюць гэтыя грошы? На падтрымку малога і сярэдняга бізнесу, на падтрымку людзей, якія ў любы момант могуць застацца без працы ці ўжо засталіся без працы? Не! Упэўнены, што гэтыя крэдыты пойдуць на ўтрыманне спецслужбаў, войска, міліцыі, чыноўнікаў, стратных дзяржаўных прадпрыемстваў, ну і можа быць крыху, спадзяюся, перападзе настаўнікам і медыкам. А па выніку мы, беларускі народ, залезем яшчэ ў большыя пазыкі перад светам. Што рабіць? Адказ адзін — не маўчаць. Браць прыклады з Сяргея Ціханоўскага, Нехты, ініцыятывы BYCOVID19. Ствараць YouTube-каналы, старонкі ў сацсетках, здымаць відэа і расказваць праўду пра тое, што адбываецца ў краіне. Станавіцца назіральнікамі на выбарах. Раскрываць хлусню, фальсіфікацыі і паказуху ў вашых гарадах і мястэчках. Я вельмі ўсцешаны, што з’яўляецца ўсё больш і больш беларусаў, якія не баяцца казаць праўду, мужна абараняюць сваю пазіцыю, выказваюць салідарнасць і падтрымку. Толькі самаарганізацыя, самаадукацыя і салідарнасць дазволяць нам, беларусам, самастойна абараніць сябе, адстаяць права на свабоду выказванняў, свабоду выбару, свабоду мірных сходаў. Наша з вамі задача, каб словы ўсіх незадаволеных беларусаў пераўтварыліся ў моцны і смелы голас шматмільённага народа, які сваёй неабыякавасцю будзе мяняць гэтую ўкаранелую бюракратычную і карумпаваную сістэму ў краіне. Давайце не проста сядзець на кухнях і бурчаць. Прыйшоў час рабіць учынкі! Жыве Беларусь!