Калі жахлівае відэа з трупамі кароваў, якія ляжалі недалёка ад фермы ў вёсцы Стрэшын, што ў Жлобінскім раёне было апублікавана на сайце канала “Белсат” журналістам патэлефанаваў старшыня Стрэшынскага сельсавета Аляксандр Александровіч. Ён запэўніваў, што апублікаванае відэа знятае ў іншым месцы, гэта не стрэшынская ферма, а ў Стрэшыне – поўны парадак і прыгажосць. Каб спраўдзіць гэтую інфармацыю нашыя журналісты выехалі ў вёску. Месца, якое паказанае на відэа, аказалася як раз у нізінцы за стрэшынскай фермай. Напярэдадні тут ужо паспелі пакапацца “Амкадорам” супрацоўнікі правяраючых органаў. На месцы раскопаў бачныя пахаванні кароваў і цялят. З зямлі тырчаць косці, а ў паветры невыносны смурод. Вакол дакуль бачна воку – незасеяныя палі, парослыя высачэзнай лебядой. З воданапорнай вежы, якая сілкуе вадой ферму, свішча вада, а ад хлявоў з каровамі, многія з якіх хворыя, цякуць рэкі гною. Усе рабочыя, якія раней працавалі на стрэшынскай ферме, кажуць, што асноўная прычына абыякавасці супрацоўнікаў – непаважлівае і бесчалавечнае стаўленне да сваіх падначаленых прызначанай не так даўно дырэктаркі сельгаспрадпрыемства Вольгі Камай. Цяперашнія работнікі размаўляць з журналістамі адмаўляюцца, бо баяцца рэпрэсіяў з боку кіраўніцтва. Дырэктарка не раз заяўляла тым, хто наважваўся ісці супраць яе, што ў яе вялікія сувязі і ніхто нічога з ёй не зробіць. Пасля публікацый у СМІ, у Стрэшын прыехалі з праверкамі супрацоўнікі МУС, КДБ і дзяржкантроля. Як сцвярджалі ў прыватных размовах з нашымі журналістамі жыхары Стрэшына, па вёсцы гавораць, што на ферме недалічыліся каля 300 галоваў жывёлы. Віталь Грыцкоў працаваў у КСУП “Стрэшынскі” вартаўніком на той самай ферме, якая была паказаная на нашумелым відэа. Але кіраўніца гаспадаркі прымусіла яго выконваць неўласцівыя вартаўніку абавязкі – грузіць і развозіць кармавую муку, бо даглядчыкі, якія мусяць гэта рабіць, папросту не выходзяць на працу. Калі ён адмовіўся гэта рабіць, яго проста звольнілі. Пагражала дырэктарка сельгаспрадпрыемства звальненнем і ягонай маці за тое, што Віталь спрабаваў абараняць свае правы праз суд. Падрабязнасці ў матэрыяле карэспандэнткі сайта “Гомельская вясна” Ларысы Шчыраковай Відэа Ларыса Шчыракова, Андрэй Мядзведзеў Гомельская вясна