У Светлагорску за шкоду здароўю жыхары праз суд спрабуюць спагнаць 750 тыс. долараў (+відэа) У раённым судзе адбыліся папярэдняе паседжанне (суддзя Людміла Сядзько) па грамадзянскай пазове Тамары Кавальчук супраць кітайскай карпарацыі “Самсэ” аб спагнанні маральнай і матэрыяльнай шкоды, якая, на яе думку, была нанесена дзейнасцю завода беленай цэлюлозы, якую “па ключ” меліся збудаваць кітайцы. Напрыканцы 2017 года на прадпрыемстве пачаліся пусканаладачыня работы і з гэтага часу жыхары гораду і раёна адчуваюць пах дрэннапахнушчых газаў (меркаптанаў ды інш). Жыхары масава скардзяцца на кепскае адчуванне, галавакружэнне, ваніты, крывяцячэнне з носу, болі ў розных органах. Сп. Кавальчук у сваёй пазове адзначыла, што “віна адказчыка ў тым, што ён не забяспечыў бяспечнай эксплуатацыі завода беленай цэлюлозы, абсталяванне і сыравіна якога з’яўляюцца крыніцай павышанай небяспекі падчас правядзення пусканаладачных работ і парушылі заканадаўства ў галіне аховы навакольнага асяроддзя”. Пазоўнік таксама пералічавае агульныя для жыхароў Светлагорску і раёну скаргі, шкода здароўю: “пагоршылася самаадчуванне, адбылося абвастрэнне хранічных захворванняў, узніклі новыя хваробы, узнікла неабходнасць у правядзенне спецыяльнай медычнай дыягностыкі арганізму, дадатковым аглядзе лекараў, аздараўлення ў санаторна – курортных установах, спецыяльным харчаванне і дадатковым даглядзе”. Суддзя Сядзько задаволіла хадайніцтва кітайскага боку, які прасіў дадатковы час і інфармацыю, якая тычыцца доказнай базы істца. Разгляд справы перанесены на 30 верасня. Нагадаем, гэта ўжо друая спроба жыхароў Светлагорску і Якімавай Слабады спагнаць з кітайскай карпарацыі маральную і матэрыяльную шкоду ў сувязі са шкоднымі выкідамі з завода сульфатнай беленай цэлюлозы. У сакавіку 2018 года яны ўжо накіроўвалі калектыўную заяву ў суд светлагорскага раёну. Пазоў быў адхілены і не прыняты да разгляду. Аўтар Ларыса Шчыракова Фота, відэа аўтара Гомельская вясна