Паэт Анатоль Сыс сабраў аматараў яго творчасці на падворку роднай хаты (+ відэа) Літаратурна – мастацкае свята «Дух – гэта, людзі, я» у гонар 60 – годдзя з дня нараджэння паэта Анатоля Сыса адбылося ў яго на радзіме ў вёсцы Гарошкаў, што ў Рэчыцкім раёне. На свята завіталі яго сябры калегі, настаўнікі і аматары яго творчасці. Пасля наведвання гарошкаўскіх могілак, на падворку бацькоўскай хаты Анатоля Сыса паэты, літаратары распавядалі пра яго ды чыталі Анатолевы і свае вершы. Літаратар Алесь Бяляцкі прэзентаваў нумар літаратурнага часопіса «Верасень», дзе ўпершыню былі надрукаваны лісты да родных Анатоля Сыса часоў студэнцтва і службы ў войску. Лісты паэта прасякнуты клопатам пра яго сваякоў і аднавяскоўцаў. Выкладчык Анатоля Сыса прафесар Іван Штэйнер з гомельскага ўніверсітэту ім. Скарыны распавёў на падворку пра сваю новую кнігу, прысвечаную творчасці паэта. Не абышлося свята і без спеваў. На вершы паэта напісана шмат песняў, некаторыя з іх заспявалі барды з Гомля Вольга Цярэшчанка і Андрусь Мельнікаў. Свята скончылася пачастункам удзельнікаў свята ад сястры Анатоля Сыса Тамары. На свяце пабывала карэспандэнтка сайта «Гомельская вясна» Ларыса Шчыракова Фота і відэа аўтара Гомельская вясна