Палітзняволены Дзмітрый Івашкоў выйшаў на пратэст хаця дакладна ведаў, што трапіць у СІЗА (+відэа) З 27 верасня 2020г. у СІЗА спачатку Менска, а цяпер Гомля знаходзіцца сябра ініцыятыўнай групы Святланы Ціханоўскай Дзмітрый Івашкоў. 40-гадовы інжынер браў удзел у зборы подпісаў, а потым у агітацыі за кандыдатку. Разам з паплечнікамі арганізоўваў мітынгі ў Буда-Кашалёве, Ветцы, Рэчыцы, Светлагорску, Добрушы, Петрыкаве, Чачэрску, Хойніках, Рудабелцы. Перад выбарамі быў брутальна затрыманы і змешчаны ў ізалятар Гомля, а потым Брагіна на 15 сутак, але ў сувязі з траўмамі, якія ён атрымаў пры затрыманні, быў пераведзены ў шпіталь. Праз некалькі дзён пасля выбараў быў вызвалены з-пад варты. Напрыканцы жніўня да Івашковых у хату прыйшлі міліцыянты і Дзмітрый быў вымушаны месяц хавацца ад арышту. 27 верасня падчас апошняга арганізаванага Маршу пратэсту ў Гомлі стаў у счэпку ў першы шэраг і быў затрыманы. Падчас следства сядзеў у турме на Валадарцы ў Менску, каля тыдня таму пераведзены ў Гомель. Неўзабаве над ім і іншымі сябрамі агітацыйнай групы Ціханоўскай (Таццянай Канеўскай, Юрыем Уласавым, Аляксандрам Шабаліным) адбудзецца суд. Дзмітрыя Івашкова з паплечнікамі вінавацяць у “падрыхтоўцы дзеянняў, якія груба парушаюць грамадскі парадак” і ў намеры захопу дзяржаўных будынкаў. Дзмітрый Івашкоў мае жонку Святлану і 10-гадовага сына Мікіту. Пра шлях Зьмітра Івашкова ў палітыку, агітацыйную кампанію, пераслед і турму распавялі сайту “Гомельская вясна” яго сястра Алена Андрэява і актывістка Алена Давыдава. Аўтар Ларыса Шчыракова Фота і відэа аўтара Гомельская вясна