За некалькі дзён да выбараў быў арыштаваны давераная асоба Святланы Ціханоўскай гамяльчук Юрый Уласаў. За няпоўны месяц, які быў адведзены на агітацыю агітбрыгада кандыдаткі зладзіла мітынгі ў 10 гарадах Гомельшчыны (Светлагорску, Рэчыцы, Рагачове, Буда-Кашалёве, Чачэрску, Добрушы, Ветцы, Рудабелцы, Петрыкаве, Хойніках). Яны нязменна збіралі шмат людзей і карысталіся папулярнасцю. Перад пачаткам выбарнай кампаніі 7 мая на сустрэчы ў Гомлі супраць адвольнага арышту Сяргея Ціханоўскага – Юрый Уласаў – адзін з арганізатараў, быў затрыманы і пакараны 45 суткамі арышту. Падчас следства пасля выбараў Юрый Уласаў, якога праваабарончая супольнасць прызнала палітзняволеным, знаходзіўся пад вартай у турме на Валадарцы ў Менску. Некалькі тыдняў таму яго перавялі ў СІЗА № 3 Гомля, неўзабаве пачнецца суд. Юрыя Уласава разам з Таццянай Канеўскай, Аляксандрам Шабаліным, Дзмітрыем Івашковым абвінавачваюць у падрыхтоўцы масавых беспарадкаў і планах захопу адміністратыўных будынкаў. У відэа – яскравыя прамовы Юрыя Уласава падчас агітацыйных мітынгаў за Святлану Ціханоўскую на Гомельшчыне. Аўтар Ларыса Шчыракова Відэа Дзмітрый Лукомскі Гомельская вясна