Давераную асобу Святланы Ціханоўскай гамяльчанку сп. Таццяну арыштавалі за некалькі дзён да выбараў і змясцілі ў турму на Валадарцы ў Менску. Праваабарончая супольнасць Беларусі прызнала яе палітзняволенай. За няпоўны месяц, які быў адведзены на агітацыю, гомельская агітбрыгада кандыдаткі Ціханоўскай зладзіла мітынгі ў 10 гарадах Гомельшчыны (Светлагорску, Рэчыцы, Рагачове, Буда-Кашалёве, Чачэрску, Добрушы, Ветцы, Рудабелцы, Петрыкаве, Хойніках). Яны збіралі шмат людзей і карысталіся папулярнасцю. Перад выбарамі, апасаяся затрымання, Таццяна Канеўская змушана была хавацца ад міліцыі. Некалькі разоў яна мяняла кватэры, дзе ёй давалі прытулак. У той жа час у яе хаце адбыліся некалькі ператрусаў. У рэшце рэшт актывістку затрымалі і змясцілі пад варту. Некалькі тыдняў таму Таццяну Канеўскую этапавалі ў Гомель, дзе неўзабаве адбудзецца суд як над самой актывісткай, так і над яе паплечнікамі Юрыем Уласавым, Аляксандрам Шабаліным, Дзмітрыем Івашковым. Іх абвінавачваюць у падрыхтоўцы масавых беспарадкаў і планах захопу адміністратыўных будынкаў у Гомлі. У відэа – паламяныя прамовы Таццяны Канеўскай падчас агітацыйных мітынгаў за Святлану Ціханоўскую на Гомельшчыне. Аўтар Ларыса Шчыракова Відэа Дзмітрый Лукомскі Гомельская вясна