Публікацыя на сайце "Гомельская вясна" (https://gomelspring.org/be/news/8613) Анлайн-трансляцыя з судовага паседжання на нашым Тэлеграм-канале (https://t.me/viasnaHomel) У Гомлі распачаўся працэс над 26-гадовым Дзмітрыем Канеўскім, якога вінавацяць па арт.130 КК РБ (наўмысныя дзеянні накіраваныя на распальванне расавай, рэлігійнай, сацыяльнай ды інш. варожасці). Маладзён напісаў каментар у адным з гомельскіх тэлеграм-каналаў, дзе заклікаў да гвалту над амапаўцамі. 14 студзеня яго ўзялі пад варту і выставілі абвінавачанне. З гэтага часу ён знаходзіцца ў СІЗА №3 Гомля. Працэс распачаўся ў абласным судзе (суддзя Царук, пракурор Асадчы). Дзмітрый Канеўскі цалкам прызнаў сваю віну і патлумачыў суду, што напісаў такі жорсткі каментар бо даведаўся што яго саслужыўца забілі амапаўцы падчас паслявыбарных пратэстаў. Пасля такой навіны ў моцным стрэсе і пасля ўжывання алкаголю ён напісаў каментар дзе заклікаў да гвалту над сілавікамі. Таксама каментар утрымліваў шмат абразаў на іх адрас. Пасля арышту следчы паведаміў Дзмітрыю Канеўскаму, што яго саслужывец жывы і маладзёна проста ўвялі ў зман. У судзе былі дапытаны сведкі: сяброўка Дзмітрыя Канеўскага, якая распавяла пра добрыя якасці і характар абвінавачанага і супрацоўнік ГУБАЗіКу, які патлумачыў, што атрымаў інфармацыю пра размяшчэння каментара з заклікамі да гвалту ў Тэлеграм-канале, высветліў, што пад нікам «Джымі Бананас» хаваецца Дзмітрый Канеўскі. Супраціву падчас затрымання апошні не аказваў. На суд падтрымаць Дзмітрыя Канеўскага прыйшлі яго сваякі, грамадска-палітычныя актывісты і праваабаронцы. Працяг суду 15 чэрвеня. Як каментуюць справу сваякі Дзмітрыя Канеўскага, праваабаронцы і нават сам абвінавачаны (архіўны запіс) – глядзіце ў відэа «Гомельскай вясны». Аўтар Ларыса Шчыракова Фота і відэа аўтара Гомельская вясна