Пракурорка Гаркуша запрасіла для Уладзіслава Наважылава пакаранне 3 гады «хіміі» за каментар пад відэа пра сустрэчу кіраўніка аблвыканкаму Генадзя Салаў’я з гамельчукамі 16 жніўня падчас Маршу пратэсту на ганку аблвыканкаму. Суд над фронтмэнам метал-гурту «Gods tower» распачаўся ў судзе Цэнтральнага раёну Гомля 15 чэрвеня. Суддзя Кармановіч, пракурорка Гаркуша, пацярпелы Генадзь Салавей. Прадметам разбіральніцтва стаўся каментар на відэахостынгу youtube у якім музыка напісаў «Салавей – надзвычай гл…пы (неразумны) бораў». Сп.Наважылава вінавацяць па арт.369 КК РБ «Публічная абраза прадстаўніка ўлады пры выкананні ім службовых абавязкаў». На судзе Уладзіслаў Наважылаў патлумачыў, што падчас размовы Салаў’я з людзьмі чакаў адказаў на пытанні грамадска-палітычныя, якія на той момант вельмі моцна хвалявалі грамадства: напрыклад пра смерць падчас затрымання Аляксандра Віхора ды інш. Але адказы былі ні аб чым, на думку Уладзіслава. Абураны гэтым фактам ён і пакінуў такі каментар, які, як ён патлумачыў суду, не быў абразай, а выказваннем уласнага меркавання адносна чыноўніка – прадстаўніка інтарэсаў народу. Падчас судовых спрэчак пракурорка Гаркуша пералічыла, што Уладзіслаў мае на ўтрыманні непаўнагадовых дзяцей, сталае месца працы з выдатнымі характарыстыкамі, сталае месца жыхарства. Але не гледзячы на гэта яна запрасіла 3 гады «хіміі» – максімальнае пакаранне па арт.369 КК РБ. Адвакатка заўважыла, што пракурорка не ўлічыла змякчальных абставінаў: напрыклад наяўнасць непаўнагадовых дзяцей на ўтрыманні. Яна папрасіла суд даць Уладзіславу Наважылаву штраф, альбо хатнюю «хімію». Вырак для музыкі будзе абвешчаны ў судзе 21 чэрвеня. Аўтар Ларыса Шчыракова Фота і відэа аўтара Гомельская вясна (https://gomelspring.org/be/news/8623) Падпісвайцеся на наш тэлеграм-канал (https://t.me/viasnaHomel)