Да 26 чэрвеня, калі ва ўсім свеце адзначаецца гэтая дата, бельгійскія беларусы ў Брусэлі зладзілі перформанс, дзе паказалі, якому пераследу падвяргаюцца людзі ў Беларусі, якія не падтрымліваюць існуючы палітычны рэжым. Недалёка ад бюста Шумана і будынку Еўракамісіі сабраліся каля 90 беларусаў, сярод якіх былі і ўраджэнцы Гомельшчыны, каб нагадаць пра беларускіх палітзняволеных і ўжыванне катаванняў да затрыманых, падазраваемых, абвінавачаных і асуджаных у Беларусі. Удзельнікі трымалі ў руках партрэты палітзняволеных і агучвалі іх імёны і прозвішча. Агулам 501 чалавека, якіх беларускія праваабаронцы прызналі палітычнымі зняволенымі, то бок людзьмі, якія трапілі пад пераслед па сфабрыкаваных справах за сваю грамадзянскую пазіцыю. Падчас акцыі прысутныя заслухалі зварот жонкі палітзняволенага беларускага палітыка Міколы Статкевіча Марыны Адамовіч, дзе яна распавядала пра працэс над яе мужам і Сяргеям Ціханоўскім, Ігарам Лосікам, Дзмітрыем Паповым, Уладзімірам Цыгановым, які распачаўся 24 чэрвеня ў гомельскім СІЗА №3 у закрытым рэжыме. «Перформанс у нас быў чыстай вады імправізацыя, – распавядае адна з арганізатарак акцыі былая гамяльчанка Таццяна Марчанка, – Мы падрыхтавалі канешне сюжэт, дэкарацыі, прынеслі рэквізіт, а ўдзельнічалі ў ім усе ахвотныя і рабілі так як яны адчуваюць і ўяўляюць палітычны пераслед, які адбываецца ў Беларусі, асабліва пасля прэзідэнцкіх выбараў».