Слава неДэза, Сяргей Старыкаў і Ігар Архіпаў далучыліся да дня жалобы па расстраляных гомельскіх святарах і верніках, які адзначаецца ў Гомлі 1 лістапада. У ноч з 31 кастрычніка на 1 лістапада 1937г. пад Гомлем былі расстраляны 50 чалавек: святары, служыцелі царквы, манахі, манашкі і простыя вернікі. Гомельскія музыкі прысвяцілі сталінскім ахвярам свае песні і зрабілі відэа з месца масавых расстрэлаў у Шчакатаўскім лесе ля Гомля. Ігар Архіпаў паклаў на музыку верш «Спі» расстралянай у 1937г. паэткі Валянціны Казлоўскай. Верш быў напісана паэткай у 1926 годзе ў памяць аб памерлай заўчасна сяброўцы, але ён апынуўся прароцкім і для самой паэткі. Слава неДэза заспяваў песні «Атэсіт» і «Страшны лес». Апошняя непасрэдна прысвечана масавым расстрэлам беларускіх грамадзянаў напрыканцы 30-х гадоў. На яе ў супрацы з ініцыятывай па ўшанаванні ахвяраў савецкіх рэпрэсій «Забітыя і забытыя» быў запісаны кліп на адным з месцаў масавых расстрэлаў ля Гомля ў Бутулінскім лесе. У відэа музыка таксама распавёў пра месца памяці і жалобы ў Шчакатаўскім лесе, дзе гомельскія манахі ў пачатку 90-х гадоў усталявалі крыж у памяць забітых святароў і вернікаў. Аўтар Ларыса Шчыракова Фота аўтара Гомельская вясна Тэлеграм https://t.me/viasnaHomel