Мы, беларускія палітычныя партыі, грамадскія арганізацыі, прафсаюзы, незалежныя эксперты, разумеючы, што пабудова ў Беларусі прававой, дэмакратычнай дзяржавы, захаванне і ўмацаванне суверэнітэту і незалежнасці краіны, сацыяльна-эканамічныя рэформы, вольны рынак, нацыянальнае адраджэнне – падмурак для існавання нашай краіны. Ацэньваем сітуацыю ў Беларусі, як крызісную і канстатуем няздольнасць сённяшняй улады забяспечыць дабрабыт і бяспеку грамадзян, гарантаваць недатыкальнасць, правы і свабоды беларусам. Рэанімацыйны пакет рэформаў – грамадска-палітычная пляцоўка, якая спалучае вядучыя дэмакратычныя Партыі, НДА і экспертаў, і выконвае функцыі каардынацыйнага цэнтра па распрацоўцы і прасоўванне ключавых рэформаў у Беларусі. Мы бачым сваю місію ў распрацоўцы і прасоўванні зменаў з мэтай вяртання нашай краіны на шлях пабудовы незалежнай, дэмакратычнай, прававой, еўрапейскай дзяржавы. Аўтарытэтнай, а не аўтарытарнай Беларусі, дзе свабодныя грамадзяне карыстаюцца роўнымі правамі і разам вырашаюць сваю будучыню. Мы заклікаем экспертную супольнасць, партыі, прафсаюзы і НДА далучацца да гэтай ініцыятывы, праяўляць актыўнасць у абмеркаванні і ініцыяваць новыя тэмы для дыскусіі. Мы ўпэўнены, што вобраз новай Беларусі – гэта калектыўнае жаданне кожнага грамадзяніна жыць годна на сваёй зямлі. І ў гэтым наша нацыянальная згода! Жыве Беларусь!