У Гомелі ў ноч з 11 на 12 жніўня 2020 года памёр 25-гадовы Аляксандр Віхор, якога амапаўцы затрымалі 9 жніўня. У шпіталь з СІЗА яго прывезлі пасля неаднаразовых збіванняў увечары пасля затрымання. У Аляксандра былі праблемы з сэрцам. Пасля доўгага знаходжання ў душнай машыне ён паскардзіўся на дрэннае самаадчуванне, але амапаўцы не звярнулі на гэта ўвагі. Пра тое, як усё адбывалася, праваабаронцам распавёў гамяльчук Радзівон Бегляк, якога этапавалі ў СІЗА ў адным «стакане» з Аляксандрам. Ягоныя сведчанні агучвае акторка Крысціна Дробыш. «Вясна» і «Палітвязынка» на відэа сабралі толькі малую частку таго, што палітзняволеныя перажываюць за кратамі. З нагоды Дня палітвязняў Беларусі мы хочам, каб іх галасы былі пачутыя.