Менскі world rock-гурт Re1ikt прэзэнтуе музычнае відэа «Пра чорныя вочы». Кліп зьняты да кампазыцыі, складзенай паводле апавяданьня рэпрэсаванага ў 1937 годзе беларускага пісьменьніка Міхася Зарэцкага ў рамках мастацкага праекту інтэрнэт-парталу TuzinFM «(Не)расстраляная паэзія». У кадры можна пабачыць унікальныя архіўныя дакумэнты: старыя фатаграфіі, выявы кніжных вокладак, даведку пра рэабілітацыю… «Мы не хацелі рабіць нейкую пастаноўку, здымаць рамантычную гісторыю, а вырашылі прадэманстраваць сведчаньні жыцьця пісьменьнікаў, выкрэсленых з памяці людзей: што выдаваліся кнігі, што людзі захапляліся гэтай літаратурай», - кажа лідар гурта Re1ikt барабаншчык Аляксандар Дземідзенка. Доўгі час Міхась Зарэцкі - аўтар шэрагу псіхалягічных апавяданьняў, п’ес, аповесьці «Голы зьвер», раманаў «Сьцежкі-дарожкі» ды «Вязьмо» - заставаўся сапраўдным літаратурным прывідам. Многія рукапісы Зарэцкага загінулі, у прыватнасьці, гістарычная драма «Рагнеда» й працяг раману «Крывічы». З гэтае прычыны музыкам нават прыйшлося зьвяртацца ў архіў, каб знайсьці хоць бы нейкія матэрыялы. Між тым, у 20-я гады мінулага стагодзьдзя Зарэцкі быў літаратурнай зоркай: яго творы карысталіся вялікім попытам, а вострыя выступы ў прэсе жыва абмяркоўваліся. Re1ikt – гурт, які працуе ў напрамку world music, cпалучаючы традыцыйны беларускі песенны фальклор з актуальнымі рок-напрамкамі. У кампазыцыях каманды зьнітаваліся палескі шаманізм, аўтэнтычны драйв і таямнічы беларускі космас. Калектыў зьяўляецца ўладальнікам шэрагу музычных узнагародаў у Польшчы й Беларусі, выступаў ва Украіне, Летуве, Расеі.