Удзельнікі дыскусіі: Павел Сапелка (Вясна), Марына Касінерава (Dissidentby), Ігар Юрчык (сваяк палітвязня) Мадэратарка: Стася Гліннік Па стане на 10 траўня 1493 чалавека у Беларусі прызнаныя палітычнымі зняволенымі, і гэта толькі афіцыйна прызнаныя праваабарончымі арганізацыямі вязні сумлення. Аднак у рэальнасці лік можа ісці на тысячы. Па словах прадстаўніцы Аб'яднанага пераходнага кабінета па сацыяльных пытаннях і былой палітзняволенай Вольгі Гарбуновай, колькасць асуджаных па палітычных матывах можа раўняцца 5000 (пра гэта кажа статыстыка «экстрэмісцкіх» крымінальных спраў СК Беларусі). Сем'і зняволеных не заўсёды звязваюцца з праваабаронцамі, баючыся, што гэта можа нашкодзіць іх сям'і ці пагоршыць умовы ўтрымання палітвязняў. Акрамя таго, не кожны зняволены атрымлівае статус "палітычнага". Палітвязнямі ў Беларусі прызнае беларуская праваабарончая супольнасць (некалькіх арганізацый) на падставе крытэраў, якія былі прынятыя праваабаронцамі Беларусі, Расеі, Украіны, Грузіі, Азербайджана. Так, напрыклад, палітвязнямі не прынята лічыць тых, каго абвінавачваюць у гвалце супраць сілавікоў і пашкоджанні маёмасці. Ці могуць усе палітвязні разлічваць на рэабілітацыю, ці будуць ва ўсіх роўныя правы нараўне з афіцыйнымі палітычнымі?