Гісторыя паўтараецца: дзяржпрапаганда ізноў выцягнула з шуфлядкі запыленыя тэчкі з планамі інфармацыйнай вайны супраць нацыянальнай сімволікі — бел-чырвона-белага сцяга і герба “Пагоня”. Нам ізноў расказваюць пра “калабарантаў-паліцаяў з бел-чырвона-белымі нарукаўнымі павязкамі, якія знішчалі мірных беларусаў”, пра тое, што гэта “фашысцкая сімволіка”, што яна “штучна прыдуманая і не мае гістарычных падмуркаў”. Ці сапраўды ўсе, хто выкарыстоўваў падчас Другой сусветнай вайны нацыянальную сімволіку, — калабаранты? І чаму тыя беларусы, якія сталі пад чырвоныя сцягі, калабарантамі не лічацца? Ці былі ў паліцаяў бел-чырвона-белыя павязкі? Адказвае гісторык, геральдыст, падпалкоўнік запасу Віктар Ляхар.