11 студзеня Беларусь наведаў кіраўнік Міжнароднай федэрацыі хакея Рэнэ Фазэль. Каб на месцы разабрацца ў тым, ці варта праводзіць у нашай краіне чэмпіянат свету па хакеі. Для гэтага Фазэль днём сустрэўся з Аляксандрам Лукашэнкам, а вечарам — са старшынёй Федэрацыі хакея Беларусі Дзмітрыем Баскавым. З тым, каго падазраюць у датычнасці да смерці Рамана Бандарэнкі. Беларускі рэжым ці аматары хакея больш страцяць ад пераносу чэмпіянату з Беларусі? Як сусветная спартыўная супольнасць рэагуе на візіт Фазэля і яго сустрэчу з Лукашэнкам? Ці рэальна дамагчыся пераносу ці адмены ЧС па хакеі? На гэтыя ды іншыя пытанні адказваюць сябры Беларускага фонду спартыўнай салідарнасці — чэмпіёнка свету і Еўропы, сябра Каардынацыйнай рады Надзея Астапчук і галоўны трэнер гандбольнага клуба “Віцязь”, шматразовы чэмпіён і ўладальнік Кубка Беларусі Канстанцін Якаўлеў.