Пачынаючы са жніўня 2020 года дзясяткі выкладчыкаў былі звольненыя ці звольніліся самі на знак пратэсту са сваіх ВНУ. Былі адлічаныя за ўдзел у мірных акцыях пратэсту дзясяткі студэнтаў. Але як да сёння не спыніліся рэпрэсіі ў краіне, так не спыніліся і звальненні з ВНУ. 16 студзеня пра сваё рашэнне сысці з універсітэта фізкультуры абвясціў дацэнт Вадзім Мажэйка. Што да гэтага часу стрымлівала дацэнта ад звальнення? Якое дачыненне да навучання мае актыўная грамадзянская пазіцыя і палітычная актыўнасць студэнтаў? Ці звязаныя ўзровень рэпрэсій і ўзровень адукацыі? На гэтыя ды іншыя пытанні адказвае былы выкладчык Беларускага дзяржаўнага ўніверсітэта фізічнай культуры кандыдат навук Вадзім Мажэйка.