Сям'я Івонкі Сурвілы з'ехала з Беларусі ў 1944 годзе, калі ёй было 8 гадоў. З таго часу спадарыня Івонка ніводнага разу не была на радзіме. Хоць з 1997 года і ўзначальвае Раду БНР у выгнанні. Па яе словах, каб атрымаць беларускую візу, ёй давялося б наўпрост звяртацца з такой просьбай да Аляксандра Лукашэнкі. Чаго старшыня Рады БНР у выгнанні рабіць не жадае. Адпаведна, запрасіць яе ў мінскую студыю Еўрарадыё на запіс у праграме "Ідэя Х" не выпадала. Але 22 лістапада Івонка Сурвіла прыляцела з Канады ў Вільню — на пахаванне Кастуся Каліноўскага. Прыляцела нягледзячы на складанасці са здароўем. І нягледзячы на шчыльны графік свайго знаходжання ў Вільні пагадзілася на нашу прапанову сустрэцца для размовы пра нацыянальную ідэю.