Кожны день беларускія музыкі прэзентуюць новыя песні, у якіх адгукаюцца на сённяшнія падзеі ў Беларусі. Мінская каманда 2morrow2late — не выключэнне. У музычнай рубрыцы "Такога вы не чулі" гурт прадстаўляе кампазіцыю "Шлях дамоў", якую прысвячае ўсім сумленным людзям Беларусі. "Беларусы ўжо даказалі, што вартыя лепшага, што ў нас вельмі шмат таленавітых і разумных людзей, якія здольныя дапамагчы гэтай краіне развівацца, рухацца наперад так, каб не толькі нашы дзеці, але і мы самі маглі жыць у краіне, якой можна ганарыцца. У краіне, дзе няма карупцыі, падману, гвалту і злоўжывання ўладай. Разам мы пераможам!" — перакананыя музыкі.