Ксяндзы: адных судзяць, а другія цалуюцца з тымі, хто судзіць. За два месяцы з пачатку актыўнай фазы вайны ва Ўкраіне, ў Беларусі папалі пад рэпрэсіі 7 святароў розных канфесій. Кожны з іх на розны спосаб пакараны. Але прычына была адна. Усе яны так ці інакш выступілі супраць вайны і несправядлівасці ў краіне. І тым самым выконвалі свой пастырскі абавязак. Нагадаю іх імёны. Каталіцкія святары: Ігар Лашук -пакараны 30 базавых, Андрэй Кеўліч - суд адправіў справу на дапрацоўку, Аляксандр Баран- 10 сутак арышту, Анджэй Бульчак - вымушаны з’ехаць у Польшчу. Грэка-каталіцкі святар Васіль Ягораў - штраф 50 базавых. Баптысцкія пастыры Віталі Чычмароў - крымінальная справа і Раман Раждзественскі - штраф. Мяне асабіста не здзіўляе тое, што за сваю пазіцыю святары з боку дзяржавы атрымалі пакаранне. Здзіўляе тое, што з боку вышэйшай ўлады касцёла не атрымалі апраўдання. Чаму Касцёл не вынес свой вердыкт па рэпрэсаваным святарам? Чаму ніхто на афіцыйным узроўні не выказаўся пра іх? Чаму біскупы не бароняць добрае імя святароў? Чаму, напрыклад, не сказаць публічна, прынамсі так, як Пілат на судзе Ісуса апраўдаваў "мы не знаходзім у іх віны"? Чаму?... Хтосьці ізноў скажа, што гэта ж палітыка… Не трэба туды лезці. Але ж чаму тады некаторыя святары, нават пасля 2020г.,  і далей "цалуюцца" з прадстаўнікамі ўлады? Чаму, напрыклад, у Маладэчна 24 красавіка 2022 пад-час Імшы прамаўлялі прадстаўнікі выканкаму? Чаму мясцовы пробашч і намесніца старшыні выканкаму абменьваліся падарункамі? Чаму пра гэтую падзею catholic.by піша, а пра суды над святарамі маўчыць? Гэта што, аднабаваковая цэнзура? А можа ўсе ж  гэта і ёсць самая што не ёсць палітыка, якой Касцёлу не належыць займацца? Бо чаму той самы ксёндз з Маладэчна заўважаны толькі на здымках з чыноўнікамі, а вось здымкаў з католікамі, якіх пасадзілі няма,  прынамсі на афіцыйным каталіцкім партале? Касцёл жа для ўсіх. А ў Маладэчне ёсць і тыя католікі, якія седзяць у турме з-за сваіх поглядаў, з-за веры ў Божае Валадарства. Чаму не чутно аб тым, як той самы святар, які мае высокі аўтарытэт у вачах улады, не клапоціцца пра католіка Паўла Кучынскага з Маладэчна, які знаходзіцца за кратамі са студзеня гэтага году. Ён інвалід 2-ой групы, мае рак 4 стадыі. А калі не чутно, як Касцёл у Маладэчне дапамагае вырашыць фундаментальныя праблемы сваіх вернікаў, так навошта тады і цалавацца з уладай? Падаецца, такім пытанням "чаму?" канца няма. Але ж гэтыя пытанні даюць адказ на іншае пытанне аб далейшым існаванні касцёла. А менавіта, Касцёл, пастыры якога будуць пахнуць больш драпежнымі ваўкамі, чым сваімі авечкамі, гэтаму свету дакладна не будзе патрэбны. Бо гэта як соль, якая згубіла смак. #войнаукраина #нетвойне #беларусы #священники #война