“Чаму Бог не чуе нашы малітвы, чаму мы не можам дапамагчы  малітваю свабодзе вязняў? Зло нам помсціць: пажар у Будславе справа іх рук, “мяркуючы па бядзе з катэдры"?” Адказваючы на гэта дасланае пытанне, скажу адразу: з Богам усё ок! Ён чуе І ўсё можа! Чаму ж Бог не выконвае просьбаў? Калі не выконвае, то хутчэй з малітвай штосьці не так, чым з магчымасці Бога. Ён жа не словы слухае, а ў сэрца ўглядаецца. Пачуўшы  надысланае пытанне, мне адразу прыгадалася гісторыя прарока Абакума. Ён жыў у VII ст да нараджэння Хрыста і задаваў такое ж пытанне Богу: “Дакуль, Госпадзе, я буду заклікаць – і Ты ня чуеш, буду лямантаваць Табе пра насільле – і Ты не ратуеш? 3 Навошта даеш мне бачыць зладзейства і глядзець на гароты? Рабунак і насілле перад мною, і паўстае варожасць і падымаецца разлад. 4 Ад гэтага закон страціў сілу, і суду правільнага няма: як што бязбожны адольвае праведнага, дык і суд адбываецца перакручаны.” (Абакум 2, 2-4) Як жа нагадвае слова прарока рэальную карціну Беларусі. Думаю, таму і адказ, які дае Бог, у другім наступным раздзеле кнігі прарока, будзе вельмі добра пасаваць і ў нашай сітуацыі. У ім можна выдзеліць галоўныя думкі: “Гора таму, хто прагне неправедных набыткаў” (Аб 2,9), “гора будаўніку горада на крыві і дойліду крэпасці на няпраўдзе!" (Аб 2,12) , а «праведны сваёй верай жыць будзе» (Аб 2, 4) Бог – стратэг. Ён усё робіць дзеля таго, каб чалавеку вярнуць рай. А зямную дапамогу кожнаму з людзей Ён аказвае ў рамках  рэалізацыі свайго галоўнага стратэгічнага плана, які завецца планам збаўлення. Трэба прыгадаць, што чалавек таму згубіў рай, бо ў яго жыццё ўвайшло зло. Пра першы грэх чалавека можна дыскутаваць вельмі шмат, але не падлягае дыскусіі тое, што зло ўвайшло праз хлусню і адыход чалавека ад праўды пра самога сябе. Калі пасягнуў на забаронены плод, ён адышоў ад гэтай праўды. Хлусня, прынятая чалавекам пра самога сябе, пазбавіла і годнасці чалавека. Сёння паміж рознымі ідэалогіямі свету ідзе барацьба за канцэпцыю чалавека. Хрысціянства падкрэслівае годнасць чалавека, што вынікае з таго, што чалавек створаны на вобраз і падабенства Божае і ёсць Божым дзіцём. Розныя ідэалогіі прапаноўваюць чалавека трактаваць на адзін манер - інструментальна, не надаючы важкасці ні асобе чалавека, ні яго правам.  Накшталт таго, як пісаў Ул. Маякоўскі: “единица – ноль, кому она нужна..?” Вось так, адным сказам, і перакрэсліваўся чалавек у савецкай ідэалогіі. Сацыяльнае ж вучэнне Касцёла кажа: "Чалавечая асоба не можа і не павінна быць інструментам сацыяльных, эканамічных і палітычных структур, паколькі кожны чалавек свабодны ў імкненні сваёй канчатковай мэты" (КСВК 48) Не дзіўна, бо ў Евангеллі Хрыстос праз прытчу пра добрага пастыра, які ідзе шукаць адну згубленую авечку, падкрэслівае, што кожная асоба мае непаўторную вартасць у Божых вачах. Адтуль і годнасць чалавека. Як жа звязаць вышэйагучаную думку з рэаліямі беларускімі? Усё проста. Нам усім надакучыў тэрор з боку дзяржавы. Тэрор – гэта незаконнае насілле. Гвалт, якому надаюцца прававыя нормы, а разам з тым забываецца пра прынцып справядлівасці і адыходзіцца ад праўды. Папа Ян Павел ІІ некалі за часоў свайго пантыфікату у Ірландыі тлумачыў: “Насілле – гэта хлусня”.(КСВК 496). Гэта цалкам адпавядае Божаму слову - падобную думку і параўнанне гвалту з адрачэннем ад праўды выказвае кніга Прыпавесцеў Саламона: “Гвалт бязбожных абернецца супроць іх, бо яны выракліся праўды.” (Прп 21,7) Нікчэмнае выглядае той хто сам з’яўляецца насільнікам і апраўдвае гвалт іншых.  Псальміст у Бібліі сцвярджае: “хто любіць насілле, таго ненавідзець Бог.”( Пс  11 (10),5). Вось так складваецца пасьянс. Аднак, разважаючы пра зло, я заўсёды заахвочваю задумвацца над пытаннем, як яго перамагчы. Як можна перамагчы тэрор, насілле, хлусню. Адказ адзін: трэба стаць на дарогу праўды! Хрыстос казаў: ”Пазнайце праўду, а праўда вызваліць вас” (Ян 8,32). Улада рэжыму і яго слугі, на ўсялякі кошт хочуць апраўдваць хлусню, зло, тэрор… У краіне ёсць цэлае войска ідэолагаў, якія гэта робяць. Робіцца гэта брутальна і нахабна, так, як заўсёды дзейнічае зло. Чаго ж толькі вартае адно заяўленне праўладнага палітолага і эксперта Белай Русі Пятра Пятроўскага: “Выбары сфальсіфікаваныя, і што? Выбары ва ўсім свеце фальсіфікуюцца”. Сказаў гэта на токшоў Белсата “Кожны з нас”. Згодна з логікай эксперта, рэжым мае ўладу, бо  застасаваў  падман і, адпаведна, калі улада не змянілася, то і дзейнічае гэта улада падманам. У такім кантэксце няма абсалютна нічога дзіўнага, што ворагамі гэтай улады становяцца любыя СМІ і кожны, хто нясе праўдзівую інфармацыю. Тут бай папаў пад удар рэжыму менавіта з той прычыны: былі небяспечныя, бо казалі праўду. ...