Як зрабіць планы на год, каб не сорамна было падвесці вынікі напрыканцы года? Хочаш рассмяшыць Бога, раскажы Яму свае планы - гэта вядомая ісціна.  Напэўна, яна верная ў выпадку, калі чалавек, будуючы планы, разлічвае выключна на свае сілы і мудрасць. Хто ж не сустракаў такіх "мудрацоў", якія мелі перакананні, што яны з усімі дамовяцца, ва ўсіх абставінах выйдуць на  сваё. Там не скажуць, там прамаўчаць, а ў іншых умовах дададуць слоўца, каб не гнявіць мацнейшага суразмоўцу. Пра такіх разумнікаў і іх мудрасць Апостал Павел у першым Пасланні да Карынфянаў кажа так: "... мудрасць свету гэтага ёсць неразумнасць перад Богам, як напісана: «ловіць мудрых у хітрасці іх». І яшчэ: «Гасподзь ведае разважанні мудрых, што яны марныя»." (1 Кар 3,19-20) А таму і планы іх марныя. Распачанаючы каляндарны год, Касцёл звяртае ўвагу на мудрасць.  Вядома, ўся мудрасць у Госпаду. Прарок Данііл кажа: "У Яго (Бога) мудрасьць і сіла; Ён мяняе часіны і поры, скідае цароў і ставіць цароў, дае мудрасьць мудрым і спазнанне разумным" (Дан 2,21) Чалавеку варта, каб пасля не бедаваць пра вынікі года, зрабіць планы, але абапірацца на мудрасці Бога. У адваротным выпадку бедаваць непазбежна прыдзецца. Думаць пра планы, гэта не кепска! Наадварот, Бог усё ж у свеце спланаваў і вельмі дакладна. Так, напрыклад, само тое, што прышоў у свет Збаўца, было запланавана ад самага пачатку існавання свету. Евангеліст Ян піша:  "На пачатку было Слова, і Слова было ў Бога, і Богам было Слова. Яно было ў Бога спрадвеку." (Ян 1, 1-2).  І прыход Ісуса ў свет быў спланаваны і адносна кожнага з нас Бог мае свой план. Слова Божае кажа: "Ён выбраў нас у Ім перад стварэннем свету... Ён прадвызначыў нас для ўсынаўлення праз Езуса Хрыста…" ( Эф 1, 4-5). Насамрэч мудры і шчаслівы той чалавек, які будзе будаваць не свае планы на жыццё, а пазнаваць план Божы, бо Госпад мае такі для кожнага з нас. Але гэты план і сваю будучыню пазнаваць варта не праз спробы гадання пры дапамозе варажбітаў або картаў таро, няхай сабе і вельмі папулярных. З такімі намагннямі пазнання планаў Божых, вынікі году таксама будуць сумныя. Бо Госпад, склаўшы для нас план на жыццё, пакідае нас вольнымі. У Ягоным плане прапісана адно: каб мы былі свабодныя і шчаслівыя, а як гэта асягнуць мы абіраем самі. Толькі вось абіраць трэба так, каб не забыцца пра Бога. Каб у жыцці заўсёды пакідаць на Яго месца.  У гэтым і ёсць сапраўдная мудрасць чалавека. Аўтар кнігі Мудрасці Сіраха піша: "Пахвала мудрасці — у ёй самой, і праслаўлена будзе яна сярод свайго народа." (Сір 24,1).  І вось тут адбываецца неверагоднае: калі народ праслаўляе мудрасць Божую, то і народ будзе праслаўленым (пар. Сір 24, 12). То бок зусім несорамна будзе падвесці вынік!  Няхай жа Госпад у гэтым годзе адорыць кожнага з нас і ўвесь народ Беларускі дарам сваёй мудрасці. У адваротным выпадку, будзем мець год гістарычнай памяці, хаця, больш верна сказаць не год памяці, але памінак, бо будзем памінаць сваіх блізкіх і хаваць свае мары аб шчасці ды вольнай Беларусі.